لاہور( گلف آن لائن)سابق صدر لاہور چیمبر آف کامرس اینڈ انڈسٹری پرویز حنیف نے کہا ہے کہ موجودہ بوسیدہ معاشی ڈھانچے کے ساتھ پاکستان کبھی بھی ترقی نہیں کر سکتا ،
اوپر سے نیچے تک ہر شخص ملک کی جڑوں کو کھوکھلا کر رہا ہے ، ایف بی آر جس کا کام نئے ٹیکس گزاروں کو تلاش کرنا ہونا چاہیے اس کی ساری توجہ پہلے سے ٹیکس دینے والوں کو ہراساں کرنے پر مرکوز ہے ۔ اپنے دفتر میں ملاقات کیلئے آنے والے وفد سے گفتگو کرتے ہوئے پرویز حنیف نے کہا کہ جس ادارے نے معیشت کو دستاویز ی بنانا ہے اگر اس کے اپنے افسران اور عملہ ہی چور بازار ی اور رشوت ستانی میں ملوث ہوگا توکیا یہ منصوبہ پایہ تکمیل تک پہنچ سکتا ہے ،
یہاں احتساب کو مذاق بنا دیا گیا ہے ، جس کے پاس اختیار ہے وہ اسے آئین و قانون کے مطابق استعمال نہیں کرتا بلکہ اس کے ذریعے دھونس جماتا ہے ۔ انہوں نے کہا کہ ایف بی آر کے ذمہ داران بتائیں گزشتہ پانچ سالوں میں کتنے نئے ٹیکس دینے والے تلاش کئے گئے ہیں ، اس کے مقابلے میں ہمسایہ ملک کے اعدادوشمار کا بھی جائزہ لے لیا جائے تو آنکھیں کھلی کی کھلی رہ جائیں گی ۔ کاروباری طبقہ بھی پریشان ہے اور اس کے لئے کاروباری کو جاری رکھنا مشکل بنایا جارہا ہے ۔